لو لاحظت أي وحدة من الأعراض دي، ما تتجاهلها!.

الأب إلي كان قايل نفسه كبر في العمر وبس!

العم حسن كان فخور بحياته … أسرة حنونة، عمل يحبه، وعلاقات اجتماعية ما بيقصر فيها أبدًا. كان بيفتكر إن المشاكل الصحية بتبدأ بعد الستين، ولسه قدامه وقت.

لكن جسمه كان عنده رأي تاني.

🚨 إشارات ما كانت واضحة!

في الفترة الأخيرة، العم حسن بقى يحس بإرهاق ما مفهوم، وتقلصات في بطنه تجي وتروح. أقنع نفسه إنه مجرد ضغط شغل، عادي!

لكن آدم، ولده، لاحظ شيء مهم:

"بابا، انتَ ما بقى عندك نفس تاكل؟ أكلك بقى نصه باقي في الصحن!"

"بطني معذباني شوية، شكلوا الأكل الحار ما نافع معاي" 😟

لكن في داخله، بدأ الشك يساوره: هل الموضوع مجرد أكل؟

• الإشارات زادت!

مرات كان يحس بنفاخ بعد الأكل… مرات تانية كان يواجه صعوبة في قضاء الحاجة. أسوأ حاجة؟ الفسحة بقت أصغر من المعتاد، ولونها مختلف.

لكن اليوم القاتل كان لما شاف دم لأول مرة!

"بواسير  أكيد بواسي، ما حاجة خطيرة." أقنع نفسه.

بس النزيف استمر.

"حسن، مالك بقيت نحيف؟"

الخالة ليلى، زوجته، كانت أول زول يواجهه بالحقيقة:

"إنتَ نحفت ووشك شاحب … هدومك بقت واسعة … حسن، عليك الله امشِ الطبيب."

كان حيتهرب … لكن خوفها عليه خلّاه يرضخ.

• اللحظة الفاصلة!

الدكتور سأل عن الأعراض، وطلب فحوصات. بعد أسبوع، طلعت النتيجة:

"يا عم حسن، لقينا ورم في القولون."

لحظة صمت ثقيلة. حسن حس إنه الزمن وقف.

"ورم؟ قصدك سرطان؟! بس… أنا ما عندي ألم فظيع!"

الدكتور طمّنه:

"الورم اكتُشف في مرحلة مبكرة، ودي أحسن فرصة للعلاج!"

العبرة من القصة؟ صحتك ما بتنظر!

كتير من أهلنا بيظنوا التعب والأعراض دي جزء من "الكِبَر في العمر" أو "ضغط الحياة" … لكن القصة دي بتأكد إنه لازم نسمع جسمنا!

العلامات التحذيرية إلي حس بيها العم حسن كانت؛

¹ تعب وفقدان وزن من غير مبرر.

² دم في الفسحة "الله يكرمكم".

³ نفاخ، الأم وعدم راحة في البطن.

⁴ تغيرات واضطرابات في حركة الأمعاء "حركة غير مكتملة، وفسحة صغيرة".

الرسالة المهمة؟

سرطان القولون والمستقيم قابل للعلاج إذا تم اكتشافه بدري! عدم تجاهل الأعراض ممكن ينقذ حياتك أو حياة زول بتحبه.

شارك قصة العم حسن، ممكن تكون سبب في إنقاذ حياة.

💡 فرص أن الشخص يصاب بسرطان عمرها ما كانت صفر، لكن دة ما بيعني أن الواحد يقعد بأيادي مكتفة! بدل أن الشخص ينتظر أنه يصاب بالمرض وبعدها يمشي يتعالج، مش أحسن يعمل الـ عليه على الأقل ويحاول يقلل فرص الإصابة من الأول؟ الواقية خير من العلاج لسبب

سرطان الأمعاء الغليظة ما بنقدر نمنع حدوثه 100%، لكن في عدد من الخطوات ممكن الشخص يتخذها—بالذات اللي عندهم خطر إصابة أعلى—زي الحفاظ على وزن صحي، ممارسة الرياضة (وبشكل منتظم)، الأكل الصحي، وتجنب التدخين، دي كلها تغييرات بسيطة لكن إيجابية وليها دور كبير في تقليل فرص الإصابة بسرطان الأمعاء الغليظة (وأمراض تانية كتيرة!)! وما تنتظروا لمن المرض يحصل عشان تزوروا طبيب: عمل الفحوصات بانتظام ممكن يساعد في اكتشاف أي تغييرات غير طبيعية قبل ما تتطور! 💊📋

حسّنوا من عاداتكم وزوروا طبيبكم أكتر وما بس لدواعي العلاج! خطوات بسيطة ممكن تضمن ليك مستقبل أفضل وأكثر صحة! ✨💙

فحص شنو؟ 🤔 الفحص البنتكلم عنو النوع البكشف عن الأمراض قبل ما تظهر أي أعراض أو علامات!

⭕️ الحاصل مع أمراض كتيرة أنها ممكن تبدأ في صمت تام (يعني في المراحل الأولى ما بتظهر أي أعراض): زول ممكن يكون عايش بضغط دم عالي بدون ما يعرف، وممكن وحدة يكون عندها مرض في القلب وما عندها فكرة! الحالة دي بتنطبق على أمراض كتيرة وممكن تحصل لأي زول. لكن! "الصمت" ما معناه تعايش سلمي—لأنو لما الأمراض دي تتطور لمراحل متقدمة، ممكن تبقى خطيرة.

وهنا الفحص بيجي دور الفحص البطولي! 💪✨

الفحص بيساعد في اكتشاف الأمراض دي بدري—قبل ما تبدأ تسبب أعراض واضحة وتضر بالجسم.

في حالة سرطان القولون والمستقيم، لأنو في العادة بيتطور من بوليب غير سرطاني، اكتشاف البوليب دة أثناء الفحص بدي فرصة لإزالته قبل ما يتحول لسرطان. ما كل بوليب سرطان، لكن كل بوليب عنده احتمالية وقابلية أنه يتحول لسرطان! وحتى لو تطور البوليب وبقى سرطاني، اكتشافه بدري بزيد فرصة العلاج والشفاء بشكل كبير.

📌 سرطان القولون والمستقيم قابل للعلاج بشكل كبير لو تم اكتشافه بدري! فحص بسيط ممكن يوفر عليك رحلة العلاج والمعاناة بعد التشخيص—الوقاية دااايماً أحسن من العلاج لسبب!

🩺💙 امشي اعمل الفحص، واضمن لي روحك مستقبل أفضل وأكثر صحة!

تقليل مخاطر الإصابة بأورام وسرطانات القولون والمستقيم بخطوات بسيطة.

سرطان القولون والمستقيم وأحد من أكثر أنواع السرطان إلي ممكن الوقاية منها. وعلى الرغم من كدا إلا أنه مصدر قلق صحي عالمي كبير. 

ما مُحتاج تغيير شامل جذري عشان تحمي نفسك. عادات صغير، بسيطة ومنتظمة تُقلل من خطر الإصابة بشكل كبير بمرور السنوات بإذن الله. 

يلا نتعرف على الخطوات سوا ..

¹ اتحرك، حتى لو حركة بسيطة خلال اليوم بتفيد جداً. 

- ليه الحركة مُهمة؟ النشاط البدني المُنتظم بيقلل معدل الالتهابات في الجسم، ويساعد على انتظام عملية الهضم، والي بدوره ييقلل خطر الإصابة بنسبة 40%.

- ابدأ بأنك تصنع روتين مشي يومي. اختار السلم بدل المصعد الكهربائي. إذا كنت بتجلس لساعات طويلة لازم تقيف وتحرك جسمك كل فترة. 

² أكل ألياف بكمية أكبر.

- الألياف مهمة لصحة وتغذية البكتيريا النافعة في الأمعاء، وإلي بيحسن الهضم وبدوره يقلل من خطر الإصابة بسرطان القولون والمستقيم بنسبة 30 ل 40%.

- زد الخضروات والفواكه كوجبات خفيفة بدل الأكل المُصنع. 

³ قلل تناول اللحوم المُصنعة!

- تُثبت الدراسات أنه اللحوم المُصنعة تَزيد خطر الإصابة بسرطان القولون والمستقيم بنسبة 18% نظراً لاحتوائها على مركبات ضارة للامعاء.

- استبدل اللحوم المُصنّعة بالدجاج أو السمك أو البروتينات النباتية. قلل من الوجبات السريعة والمُصنّعة. 

⁴ أشرب ما أكثر.

- الماء بيساعد على اخراج وطرد السموم من الجسم ودعم عملية الهضم. 

⁵ ما تتجاهل الفحص، بداية إنقاذ الحياة!

- سرطان القولون والمستقيم بيتطور بصمت خلال السنين، والكشف المُبكر بيزيد من معدلات النجاة لأكثر من 90% إذا أكتشف بدري.

- إذا عُمرك 45 أو أكثر قابل طبيب وافحص. 

الخطوات الصغيرة بتصنع فرق.

الوقاية من سرطان القولون والمستقيم ما بالضرورة يعني تقديم تضحيات كبيرة. كُل خطوة صغيرة بتُساهم في مستقبل أكثر صحة!

اختار عادة واحدة اليوم واستمر عليها.