الما معروف لكتير بالنسبة لينا هو إنه شهر سبتمبر من كل عام هو شهر التوعية بسرطان البروستاتا

اللي هو واحد من أكثر أنواع السرطانات المنتشرة بين الرجال وتحديداً ما فوق الخمسين عام؛ وللأسف بتزيد نسبة خطره ونسبة حدوثه كلما اتقدم الانسان في العمر وكلما كُنا أقل وعيّاً بيه وفات الآوان!

ولكن عندما يتوفر الوعي الكافي والدعم اللامحدود حنقدر نكافح هذا المرض اللعين ونمسك بإيدين بعض لحين نصل لبر الأمان.

ودا هدفنا المتمنيين نحققه معاكم - نحن المنظمة السوداني لتطوير الجراحة في السودان- من خلال رحلتنا على مدار الشهر الجاري؛ عبر مختلف الوسائط وبمختلف الآليات وبأبسط طريقة ممكنة!

ونتمنى إنكم تستمتعوا معانا وتتعرفوا أكتر عن النوع دا من السرطانات وتنقلوا الوعي للبيئة الحولكم من آباء... أعمام.. أصدقاء وزملاء 

. ✊🏽ليتمتع الرِجال بحياة صحية يستحقونها

عرفتوا شنو هو الشريط الأزرق ولا لسة 😄؟

الوصمة على الرجولة

   في رجال كثيرين بيحسوا بالـخزي والعار وحساسية تجاه موضوع أنهم يتم تشخيصهم بسرطان البروستات — بيكون عندهم فهم أن ياخ الحاجة دي معيبة أو نظرتهم ليها أنها موطن ضعف وحاجة ممكن تحط من قيمة رجولتهم!

   الأعراض الـ بيتسبب بيها سرطان البروستات — من مشاكل متعلقة بالجهاز الإخراجي وغيرها — منبع لمشاعر سلبية كتيرة، وبتفتح باب الشعور بالإحراج، الغضب، القلق، عدم الراحة.. زائد - عند فئة كبيرة - بتبدأ نظرتهم تتحول، أو يقلقو من أن نظرة الناس ليهم تتغير، فيظهرو أنهم “أقل رجولة من غيرهم”!

    كل الحاجات دي برضو بتشكل في نفس المصاب رغبة في أنه يحافظ على “مظهره الرجولي”، والرغبة دي ممكن تتجلى في أشكال كتيرة، منها: رفض تلقي العلاج، الامتناع تماااامًا وتجنب التكلم في الموضوع دة، أو حتى أنه يتجنب الفحص من البداية.

العواقب الاجتماعية، العقلية والنفسية

  تلقي خبر التشخيص ما هين طبعًا، وغالبًا هيكون هو أول باب لدخول الضغط النفسي، الإحباط، الإرهاق النفسي والجسدي، القلق، وغيرهم. بعد تشخيص المرض، المصاب كمان ممكن يختار أنه يبعد نفسه من الناس.. في رجال ممكن يختارو العزلة على أنهم يواجهو فكرة أنهم يطلعو للمجتمع أو يتعاملو مع الناس..!

مرات البعد دة بيبدأ من الناس الـ في دائرة المريض الاجتماعية — بيبدأو ينسحبو بعيد منه لأنهم “ما عارفين يقولو شنو” أو “ما عارفين يتصرفو مع مريض سرطان البروستات كيف”.. فـ بالتالي الوحدة والشعور بالهجر بيسيطرو عليه ويغرزو بذور للإحباط والاكتئاب في نفسه، وممكن حتى تكون المتسبب في مشاكل نفسية وعقلية تانية زي الاكتئاب.

!مكافحة الوصمة وأهمية الدعم

     الدعم لمرضى البروستات بدايته بتكون من عند الدكتور — من حق المريض أنه يتلقى معلومات كافية ووافية.. فـ البداية بتكون بتوجيه شامل للمريض: نخته في الصورة.. ما نمشيه ساي، لأن من حقه يكون عارف عن حالته والعلاج والأعراض.

  نقطة تانية هي أن المريض ما مفروض يتعامل على أنه مجرد “حالة” جاية تتعالج ونشيلها من القائمة! بل هو إنسان بحياة وعلاقات وأسئلة ومخاوف.. تعاطف الطبيب مع المريض و معالجة مخاوفه شيء ما يستهان بيه، ومن حق المريض أنه يلقى تعاطف ودعم معنوي ومراعاة لمخاوفه وأسئلته الخاصة.

  وبما أن دور الدكتور في الدعم ما هو الشيء الوحيد، في فئات غير مفروض برضو تساهم في توفير الدعم، من أصحاب لـ أهل وحتى المجتمع حولين المريض بشكل عام.. كل الدعم دة هدفه (ومصيره) أنه يمكّن الرجال من أنهم يتحركو: أنهم يفحصوا، أنهم ما يشعروا بـ”عار"، أنهم ما يترددوا في التواصل مع دكاترتهم عشان يواصلوا فحوصاتهم وعلاجاتهم.

 أعراض سرطان البروستات على الأغلب بتظهر لما السرطان يكون نمى بما فيه الكفاية لدرجة أنه يضغط على الإحليل (الحالب)، فـ يعمل مشاكل زي صعوبة أو آلام في التبول، سلس البول، دم في البول أو السائل المنوي، وغيرها

🔘 لكن الأعراض دي ممكن تكون تشبه أعراض متسببة بيها أمراض تانية زي تضخم البروستات أو التهاب البروستات، فـ بالتالي ضروري الدكتور يعرف عن الأعراض دي لو الشخص شاعر بيها عشان يتم عمل فحوصات إن لزمت

🔘 في حالة أن سرطان البروستات بقى في مراحل متأخرة، ممكن ينتشر لمناطق زي الرئتين، الكبد، أو العظام، فـ يتسبب بأعراض تانية زي آلام العظام والحوض، الإرهاق، فقدان الشهية، وفقدان الوزن غير المقصود.

⦿ بعد التشخيص، فريق متكامل من الأطباء المتخصصين زي أطباء الأورام، أطباء المسالك البولية، أطباء الأشعة، والممرضين هيشتغلوا مع بعض عشان يحددوا خطة العلاج الأنسب.

⦿ خيارات علاج سرطان البروستات متنوعة؛ الجراحة ما الخيار الوحيد وما بالضرورة الحل الأنسب في كل الحالات — في طرق تانية زي العلاج بالإشعاع، العلاج الهرموني، العلاج الكيميائي، وغيرها.. عشان الدكتور يقدر يحدد العلاج الأنسب، بيخت في الاعتبار مرحلة الـ وصل ليها السرطان، مدى انتشاره، الحالة الصحية العامة للمريض. لكن في نهاية الأمر، الدكتور بـ يدي اقتراحات، والقرار الأخير في يد المريض!

🔵المتوقع شنو بعد العلاج؟🔵

⦿ بعد العلاج، ممكن تظهر آثار جانبية متأخرة أو طويلة المدى (منها مثلًا مشاكل في التبول وضعف الانتصاب).. في منها آثار ممكن تتحسن مع الوقت، وفي غيرها ممكن تستمر. عشان كدة المتابعة المنتظمة مع الدكتور مهمة!

⦿ مواجهة سرطان البروستات صعبة وممكن الحياة من بعده تكون صعبة كذلك، لكن في طرق عشان الواحد يتأقلم، منها أن الواحد ينضم لمجموعات الدعم المعنوي، ممارسة الرياضة والأكل الصحي، وعمومًا الحفاظ على حياة صحية.

⦿ طيب.. في حالات السرطان ممكن يرجع تاني بعد ما تم علاجه، الحل شنو؟ هنا العلاج هيعتمد على عدة عوامل منها: العلاجات السابقة اللي تلاقاها المريض وحالته الصحية.. الطاقم الصحي المعتني بمريض السرطان هيساعده في مرحلة التعرف على خيارات العلاجات التانية المناسبة.

إليكم بشارة خير — ما نفقد الأمل!! مع التقدمات الحالية في المجالات الصحية، كتير من المرضى الـ كانو في مواجهة سرطان البروستات مش بس قدرو يتغلبو عليه.. بل كذلك قدرو يكملو حياة عادية مليئة بالرضا والنشاط والإنجازات! 💙🙏

خلينا نديكم ملخص سريع كدا عن رحلتنا في سبتمبر

🌟سبتمبر يعد شهر التوعية بمرض سرطان البروستاتا؛ واللي هو ما بس الأكثر انتشاراً يين الرجال حول العالم بل كمان في السودان.

🌟الفئة الأكثر تعرضاً هم الرجال فوق ال ٤٥؛ وكمان العرق والتاريخ المرضي بيزيد إحتمالية الإصابة.

🌟في خرافات كتيرة جدا عن المرض، وما أي عرض تحس بيه معناها عندك السرطان؛ ودا ما بينفي ضرورة مراجعة الطبيب المختص.

🌟سرطان البروستات زيه وزي أنواع السرطانات الأخرى؛ بدون أعراض في المراحل الأولى؛ وليه عدة مؤشرات في الحالات المتقدمة.

🌟في عدة طرق للكشف منها اختبارات معملية معينة أو الكشف عن طريق الأشعة.

🌟العلاج بيتم بعدة طرق؛ منها الجراحة والعلاج الكيميائي؛ وبيتم تحديده على حسب وضعك.

شنو واجبنا كمجتمع يمثل فيه الرجال عنصر أساسي؟

🔍توعية الحولينا من آباء وأعمام وزملاء وأخوان؛ ومهما كانت المعلومة صغيرة فالفائدة كبيرة.

🔍دعم الرِجال وتشجيعهم على الفحص وخاصة إذا حسوا بالأعراض.

🔍دعمهم أثناء فترة العلاج وبعدها عشان الوضع النفسي حيأثر جداً في الإستجابة للعلاج.

🔍التخفيف من الوصمة الناتجة من المرض؛ والتعامل معاه على إنه مرض عادي وقابل للعلاج.

🔍السعي دائما لمحاربة أي خرافة وتصحيح مفاهيمنا ومفاهيم الحولنا عن سرطان البروستات.

🔍مطالبة مسؤولي النظام الصحي عامةّ لجلب تقنيات الكشف المبكر وتوفيره في السودان.

لخلق مجتمع يتمتع فيه الرِجال بصحة وعافية💙.